Atletico Madrid hafnaði risatilboði frá Manchester United í sóknarmanninn Joao Felix.
Þetta kemur fram í frétt AS á Spáni en Felix er 22 ára gamall og er með kaupákvæði upp á 350 milljónir evra.
Enska stórliðið bauð 130 milljónir evra í Felix en Atletico hefur engan áhuga á að selja.
Félagið gæti þó grætt með því að selja fyrir þessa upphæð en Felix kostaði um 120 milljónir evra frá Benfica árið 2019.
Samkvæmt enskum miðlum eru fjórir leikmenn sem koma til greina sem Man Utd gæti notað sem hluta af kaupverðinu.
Þeirra á meðal er Cristiano Ronaldo sem er sterklega talinn vilja yfirgefa félagið fyrir lok gluggans.
Einnig er hinn ungi Amad Diallo nefndur til sögunnar en hann hefur aðeins spilað níu deildarleiki fyrir Man Utd.
Varnarmaðurinn Eric Bailly kemur þá til greina en hann var áður hjá Villarreal sem og bakvörðurinn Aaron Wan-Bissaka sem hefur ekki staðist væntingar á Old Trafford.
