Það gengur allt á afturfótunum hjá stórliði FH. Liðið er í tíunda sæti Bestu deildar karla, stigi á undan Leikni Reykjavík, sem á tvo leiki til góða.
Í gær tapaði FH 4-1 gegn ÍBV í Vestmannaeyjum. Fimm umferðir eru eftir af heðfbundnu tímabili í deildinni áður en henni verður tvískipt. Er FH í alvöru fallbaráttu.
Málið var til umræðu í hlaðvarpsþættinum Dr. Football í gærkvöldi.
„Það er búið að tala um að við sem stjórnum hlaðvörpum séum að taka einhverja silkihanskameðferð á Eið Smára (þjálfara FH). Ég er búinn að vera að horfa á þessa leiki hjá FH og sá líka leikina áður en hann kom og ég hef ekkert mestar áhyggjur af þjálfaranum, miðað við hvernig spilamennskan er. Þetta var ekkert frábært hjá Óla og Bjössa, þeir eru frábærir þjálfarar,“ sagði Hjörvar Hafliðason í þættinum.
Eiður Smári og Sigurvin Ólafsson tóku við FH af Ólafi Jóhannessyni og Sigurbirni Hreiðarssyni fyrr á leiktíðinni. „Mér finnst þetta verra núna hjá Eiði Smára og Venna en þetta var hjá Óla og Bjössa,“ sagði Albert Brynjar Ingason.
Jóhann Már Helgason tók í sama streng. „Þetta er ekkert búið að skána. Tölfræðin bakkar það upp að þetta hafi verið betra hjá Óla, þó það hafi verið slæmt. Honum hefur ekki tekist að finna lausnirnar. Þeir eru að reyna ýmislegt en þetta versnar bara.“
