Leikmaðurinn sem var handtekinn grunaður um að nauðga konu í síðasta mánuði hefur verið handtekinn á ný. Hann er sakaður um að hafa brotið á tveimur konum til viðbótar.

Það kom fram í gær að 29 ára gamall leikmaður í ensku úrvalsdeildinni hafi verið handtekinn þar sem kona tilkynnti nauðgun í síðasta mánuði. Á hann að vera mikilvægur hlekkur í sínu liði og á leið með landsliði sínu á HM í Katar síðar á þessu ári.

Leikmaðurinn var handtekinn í Norður-Lundúnum. Þar leika Arsenal og Tottenham.

Eftir handtöku á heimili sínu í Barnet-hverfi í Norður-Lundúnum var leikmaðurinn færður í gæsluvarðhald, þar sem hann var svo handtekinn aftur í dag.

„Á meðan hann var í gæsluvarðhaldi var hann handtekinn vegna tveggja nauðganna sem eiga að hafa átt sér stað í apríl og júní á síðasta ári. Brotin eiga að hafa verið framin á konum á þrítugsaldri,“ segir í yfirlýsingu lögreglu.

Leikmanninum hefur verið sleppt gegn tryggingu þar til í ágúst til að byrja með. Rannsókn fer nú fram.

Enski boltinn á 433 er í boði