Arnar Gunnlaugsson, þjálfari Víkings Reykjavíkur, ræddi við 433.is í höfuðstöðvum KSÍ eftir bikardráttinn í dag. Víkingur dróst gegn KR á heimavelli í 8-liða úrslitum.
„Það er frábært að fá stórleik í 8-liða úrslitum, sérstaklega þegar það er heimaleikur. Það var líka góðs viti að mæta KR í fyrra, í 16-liða úrslitum, það kick-startaði okkar tímabili þegar við slógum þá út,“ sagði Arnar.
„Þetta er svaka saga á milli þessara liða undanfarin ár þannig það er gaman fyrir knattspyrnuaðdáendur líka að sjá þessi tvö sterku lið mætast.“
Félagaskiptaglugginn er nú opinn og eru Arnar og hans menn að líta í kringum sig. „Þú ert alltaf með augun opin, þú verður að vera það ef þú ætlar að halda í við toppliðin og þróast sem klúbbur. Þú mátt aldrei loka skjalinu.“
Kristall Máni Ingason hefur verið einn sterkasti leikmaður Bestu deildarinnar í ár. Hann er líklega á förum frá Víkingi í þessum glugga. „Við búumst við því að Kristall fari,“ sagði Arnar.
