Sigurvin Ólafsson er á leið í Kaplakrika þar sem hann verður aðstoðarmaður Eiðs Smára Guðjohnsen. Sá síðarnefndi tók við sem þjálfari FH í annað sinn í fyrradag.
Sigurvin yfirgefur þjálfarastarfið hjá Lengjudeildarliði KV og aðstoðarþjálfarastarfið hjá KR til að taka við starfinu í Krikanum.
„Það er högg fyrir þá,“ sagði Benedikt Bóas Hinriksson í markaþætti Lengjudeildarinnar í gær er málefni KV voru rædd.
Hrafnkell Freyr Ágústsson, sérfræðingur þáttarins, tók í sama streng. „Hann er búinn að koma þeim upp um tvær deildir og ég get trúað því að þeir beri virðingu fyrir honum þarna. Hann hefur svolítið leitt þetta áfram.“
„Þeir (KV) eru kurteisir menn greinilega og segja já,“<(em> bætti Benedikt við.