Kristófer Páll Viðarsson gekk í raðir Grindavíkur frá Reyni Sandgerði rétt fyrir lok félagaskiptagluggans og fer vel af stað. Hann skoraði frábært aukaspyrnumark í 1-0 sigri liðsins gegn Fylki í síðasta leik í Lengjudeildinni.
Hinn 25 ára gamli Kristófer hefur komið víða við á ferlinum þrátt fyrir ungan aldur. Hann hefur einnig leikið fyrir lið á borð við Keflavík, Selfoss og Leiknir F.
Kristófer var til umræðu í markaþætti Lengjudeildarinnar í gær. „Þetta var um tíma einn af okkar efnilegustu knattspyrnumaður, auðvitað verið hræðilega óheppinn með meiðsi,“ sagði þáttastjórnandinn Hörður Snævar Jónsson.
Hrafnkell Freyr Ágústsson, sérfræðingur þáttarins, er aðdáandi leikmannsins. „Hann er líka góður í að fara framhjá mönnum og getur sparkað með báðum fótum,“ sagði Hrafnkell og hélt áfram. „Hann fór í Reyni í fyrra og fann svolítið gleðina aftur. Vonandi skorar hann og leggur upp í ár því hann hefur allt til brunns að bera.“