Hermann Hreiðarsson, þjálfari ÍBV, vildi ekki mæta í viðtöl eftir tap liðsins gegn Fylki í 32-liða úrslitum Mjólkurbikarsins í gær. Fótbolti.net sagði frá þessu.
Það var á brattann að sækja fyrir ÍBV frá því á 36. mínútu en þá fékk Tómas Bent Magnússon að líta sitt annað gula spjald. Mathias Laursen kom Fylki svo yfir rétt fyrir leikhlé.
Snemma í seinni hálfleik kom Ásgeir Eyþórsson heimamönnum í 2-0 og staðan orðin þung fyrir eyjamenn. Alex Freyr Hilmarsson setti smá líf í leikinn með því að minnka muninn fyrir ÍBV á 83. mínútu. Nær komust gestirnir þó ekki. Lokatölur 2-1.
ÍBV hefur farið illa af stað í Bestu deildinni, er í ellefta sæti með aðeins þrjú stig eftir sjö leiki. Nú er liðið dottið úr leik í bikarnum.
