Pini Zahavi, umboðsmaður Robert Lewandowski, var í viðtali við Bild á dögunum þar sem hann lætur Bayern Munchen heyra það. Lewandowski á ár eftir af samningi vínum við Bæjara og vill komast til Barcelona eftir átta ár í Þýskalandi.

„Hann vill fara í sumar. Okkur er sama um peninga. Sannleikurinn er sá að honum hefur ekki fundist að stjórnin virði sig í nokkra mánuði,“ sagði Zahavi.

Zahavi segir hann hafa verið tilbúinn að setjast að borðinu með Bayern síðasta sumar. „Síðasta sumar spurði ég stjórn Bayern hvað þeim þætti um að framlengja við Lewandowski. Svarið? Þögn. Bayern Munchen er búið að tapa Lewandowski sem manneskju og leikmanni.“

„Samningur hans er auðvitað til 2023. Þeir geta haldið honum í ár í viðbót. Það er samt ekki eitthvað sem ég myndi mæla með.“

„Fyrir Lewandowski tilheyrir Bayern sögunni.“