KA tók á móti Keflavík í þriðju umferð Bestu deildarinnar á Dalvíkurvelli í kvöld. Leiknum lauk með dramatískum 3-2 sigri KA.

KA hafði byrjað tímabilið af krafti og var liðið með fullt hús stiga fyrir leikinn eftir sigra á Leikni og ÍBV. Sömu sögu er ekki að segja af Keflavík en liðið hafði leikið þrjá leiki og tapað þeim öllum, gegn Breiðablik, Val og Víkingum og því með núll stig.

Nokkuð jafnræði var í leiknum framan af og lítið um opin færi. Leikurinn opnaðist aðeins undir lok fyrri hálfleiks og
Þorri Mar Þórisson kom KA yfir á 42. mínútu eftir skyndisókn. Gestirnir voru þó ekki lengi undir en Ingimundur Aron Guðnason jafnaði metin aðeins þremur mínútum síðar.

Heimamenn byrjuðu seinni hálfleikinn af miklum krafti og sóttu stíft að marki Keflvíkinga. Inn fór boltinn ekki og róaðist leikurinn aðeins þegar leið á.

Patrik Johannesen kom Keflavík yfir á 69. mínútu leiksins eftir sendingu inn fyrir vörn KA frá Edon Osmani. Undir lokin var mikil dramatík en heimamenn fengu vítaspyrnu á 87. mínútu er brotið var klaufalega á Daníel Hafsteinssyni innan teigs. Nökkvi Þeyr Þórisson tók spyrnuna og skoraði með því að skjóta undir Sindra í markinu. Nökkvi var aftur á ferðinni þremur mínútum síðar og reyndist hetja leiksins. Hann kom KA yfir á 90. mínútu með góðu skoti í hornið. 3-2 sigur KA staðreynd hér í kvöld. KA áfram með fullt hús stiga en Keflavík enn án stiga.

KA 3 – 2 Keflavík
1-0 Þorri Mar Þórisson (´42)
1-1 Ingimundur Aron Guðnason (´45)
1-2 Patrik Johannesen (´69)
2-2 Nökkvi Þeyr Þórisson (´87)
3-2 Nökkvi Þeyr Þórisson (90)