Meiðyrðamál Rebekuh Vardy gegn Coleen Rooney er nú fyrir dómsstólum og undanfarna daga hefur það verið tekið fyrir og það mun einnig verða gert næstu daga. Verjandi Rooney sótti hart að Rebekuh Vardy í dag, sakaði hana meðal annars um lygar og lagði fyrir hana nokkur mál sem hann vill meina að Vardy tengist beint en hún þverneitar.

Málið tengist inn í enska boltann en Jamie Vardy, framherji Leicester City er eiginmaður Rebekuh og Wayne Rooney, knattspyrnustjóri Derby County og fyrrum leikmaður Manchester United er eiginmaður Coleenar.

Co­leen Roon­ey hefur áður sakað Var­dy um að leka upp­lýsingum um einka­líf Roon­ey-fjöl­skyldunnar í fjöl­miðilinn The Sun og upplegg verjanda Rooney í dag var að koma með fleiri sambærileg mál til sögunnar, mál sem hann segir tengjast því að Rebekah Vardy eða umboðsmaður hennar fyrir tilstilli Vardy, hafi lekið upplýsingum um til fjölmiðla gegn greiðslu.

Málið hefur reynst erfitt fyrir Vardy í dómsal en þjarmað hefur verið að henni úr ýmsum áttum og mörg mál þar sem hún er sökuð um að selja blöðum upplýsingar.

Meira:
Harka að færast í leikinn – Vardy brast í grát þegar þjarmað var að henni

Í dag hefur lögmaður hennar séð um að spyrja hana spurninga og eitt af því var mál tengt Wayne Rooney og Jamie Vardy eiginmanni hennar. Fyrir nokkrum árum komu fréttir þess efnis að Rooney hefði ráðlagt Vardy að eiga orð við eiginkonu sína og segja henni að draga sig úr sviðsljósinu.

„Jamie varð reiður yfir þessu og er það enn. Hann segir að þetta samtal hafi aldrei átt sér stað, hann sagði þetta tóma steypu,“ sagði Vardy.

„Ég taldi fjölmiðla vera að búa til vandamál sem voru aldrei til staðar.“

Þegar lögmaður Vardy spurði hana út í þetta mál brast Vardy í grát og bauð dómari henni að gera tíu mínútna hlé sem Vardy þáði.