Breiðablik tók á móti FH í stórleik í Bestu deild karla í kvöld.
Fyrri hálfleikur var fremur lokaður. Gestirnir héldu Blikum vel í skefjum. Í uppbótartíma komust heimamenn hins vegar í gegn og endaði það með marki Ísaks Snæs Þorvaldssonar.
Staðan í hálfleik var 1-0.
Heimamenn byrjuðu seinni hálfleik betur og bætti Kristinn Steindórsson við marki á 71. mínútu eftir klafs í teignum.
Aðeins mínútu síðar var Ísak Snær búinn að gera út um leikinn með þriðja marki Blika. Hann skoraði eftir undirbúning Davíðs Ingvarssonar. Þetta var fjórða mark Ísaks á tímabilinu.
Breiðablik vann að lokum sanngjarnan 3-0 sigur í þessum stórleik.
Breiðablik er með fullt hús stiga eftir fyrstu þrjá leiki tímabilsins. FH er með þrjú stig.