Tveir leikir fóru fram í 8-liða úrslitum Meistaradeildar Evrópu í kvöld. Um fyrri leiki liðanna var að ræða.
Chelsea tók á móti Real Madrid. Karim Benzema kom gestunum yfir með geggjuðu skallamarki eftir undirbúning Vinicius Junior á 21. mínútu. Aðeins þremur mínútum síðar tvöfaldaði Benzema forystu Real með öðru frábæru skallamarki eftir frábæran undirbúning Luka Modric.
Heimamenn löguðu stöðuna fyrir leikhlé. Þar var á ferðinni Kai Havertz með skallamark eftir fyrirgjöf Jorginho.
Í upphafi seinni hálfleiks fullkomnaði Benzema þrennu sína eftir skelfileg mistök Edouard Mendy í marki Chelsea.
Chelsea fékk nokkur færi til að laga stöðuna það sem eftir lifði leiks en allt kom fyrir ekki. Lokatölur 1-3.
Í hinum leik kvöldsins vann Villarreal 1-0 sigur á Bayern Munchen á heimavelli.
Arnaut Danjuma gerði eina mark leiksins á 8. mínútu. Lærisveinar Unai Emery leiða því fyrir seinni leikinn í Þýskalandi.