Það var mikið fjör á Hlíðarenda í kvöld þegar Valur tók á móti KR í stórleik í Bestu deild karla.
Valur fór með 2-1 sigur af hólmi í skemmtilegum leik. Kjartan Henry Finnbogason kom KR yfir á 18. mínútu. Patrick Pedersen jafnaði fyrir heimamenn undir lok fyrri hálfleiks. Það var svo Jesper Juelsgard sem gerði sigurmarkið þegar 20 mínútur lifðu leiks.
,,Við vorum mjög góðir fyrsta hálftímann. 10-15 mínútum eftir að við komumst yfir þá þrýsta Valsararnir aftur, við förum að detta fullmikið til baka. Við gáfum þeim full of mörg færi til að að koma boltanum inn í teig,“ sagði Rúnar Kristinsson, þjálfari KR, eftir leik.
Sem fyrr segir jafnaði Pedersen fyrir Val rétt fyrir leikhlé. Það þótti Rúnari svekkjandi. ,,Það var súrt því við vorum klárir með breytingar, eða að laga hluti í hálfleik.“
KR hefur leikið vel á köflum á tímabilinu en er þó aðeins með þrjú stig eftir jafnmarga leiki. ,,Auðvitað er það ekki óskastaða. Það eykur aðeins pressuna á okkur. Næst hugsum við að við verðum að vinna,“ sagði Rúnar.
,,Frammistaðan okkar hefur verið mjög góð. En það hefur ekki gefið okkur nema þrjú stig og það er svolítið sárt. En við megum ekki missa trúna. Við verðum að halda áfram.“
KR-ingar voru ósáttir með dómgæsluna í leiknum í dag. Þeir voru til að mynda ekki sáttir með aukaspyrnuna sem Valur fékk á 70. mínútu og Juelsgard skoraði úr. ,,Ef það er brot þá dæmir hann. Upp úr henni skorar þeir. Ef það er málið (að þetta hafi verið rangur dómur) er maður náttúrulega hundfúll,“ sagði Rúnar.
,,Tvisvar í leiknum er dæmt á okkur þegar við erum í hraðri sókn og Valsmaður hleypur fyrir okkar mann og lætur sig detta. Ég skil ekki alveg línuna.“