Declan Rice er reglulega orðaður frá West Ham. Nú hefur hann gefið í skyn að hann langi að spila í Meistaradeild Evrópu.

Hinn 23 ára gamli Rice hefur verið lykilmaður fyrir West Ham og er fyrirliði liðsins þrátt fyrir ungan aldur.

Samningur hans rennur hins vegar út eftir næstu leiktíð og segir Guardian að hann ætli sér ekki að framlengja.

„Ég hef verið að gera vel fyrir félagið mitt lengi og langar að stefna hærra. Ég sé vini mína spila í Meistaradeildinni og berjast um stóra titla,“ segir Rice á blaðamannafundi enska landsliðsins, en hann leikur með því á Heimsmeistaramótinu í Katar um þessar mundir.

„Maður á bara einn feril og í enda hans langar mann að horfa til baka á stóru leikina sem maður spilaði í og það sem maður vann.“

Chelsea, Manchester City og Manchester United hafa öll áhuga á Rice, sem gæti kostað 100 milljónir punda.