Þorgrímur Þráinsson mætti í Bítið á Bylgjunni í morgun, þar sem hann ræddi pistil sem hann ritaði gær. Hefur hann vakið mikla athygli.
Spjótin hafa svo sannarlega staðið að forystu Knattspyrnusambands Íslands síðustu daga. Sambandið hefur fengið mikla gagnrýni fyrir að spila vináttulandsleik gegn Sádí Arabíu. KSÍ samþykkti leikinn gegn því að fá væna summu greidda frá Sádum. Mannréttindabrot þar í landi eru af ýmsum toga og þykir mörgum það óeðlilegt að Ísland taki leik við slíka þjóð.
Eftir leikinn á sunnudag fékk Aron Einar Gunnarsson, fyrirliði liðsins treyju frá búningastjóra liðsins fyrir að spila sinn 100 landsleik. Birkir Bjarnason og Birkir Már Sævarsson fengu samskonar treyju á síðasta ári þegar þeir klukkuðu 100 leikina. Slík hefð hefur ekki skapast í kvennalandsliðinu og við það eru nokkrar landsliðskonur ósáttar. Dagný Brynjarsdóttir steig fram fyrir skjöldu og lét sambandið heyra það.
Þorgrímur ritaði pistil í gær, þar sem hann kom starfsfólki KSÍ til varnar. Þá nýtti hann tækifærið og þakkaði KSÍ kærlega fyrir tímann sem hann var hjá sambandinu.
„Ég var starfsmaður þarna í fjórtán ár. Svo hættir maður með skrýtnum hætti fyrir ári og ég var pirraður. Ég skrifaði samt ekki neitt um það. Svo allt í einu fór ég að hugsa: Vá, ég fékk tækifæri til að fara á HM með strákunum og EM, er búinn að upplifa mínar stærstu stundir í lífinu fyrir hönd KSÍ og ég hef ekki þakkað neinum fyrir það. Þess vegna finnst mér bara gaman að skipta um skoðun,“ segir Þorgrímur í Bítinu.
„Mig langaði með þessari færslu að þakka þessum geggjuðu strákum og starfsmönnum sem ég hef verið með öll þessi ár.“
Þorgrímur segist alls ekki hafa verið að skjóta á leikmenn kvennalandsliðsins, sem gagnrýndu KSÍ, með færslu sinni.
„Ég er ekki að gera það. Ég tók undir með færslu Dagnýjar á sínum tíma, svo fór ég að velta þessu fyrir mér. Dagný og þessar stelpur, Sara Björk og fleiri eru brautryðjendur. Ábending Dagnýjar er bara gerð af góðum hug til þess að vernda komandi kynslóðir. Auðvitað á sama umgjörð og allt slíkt að vera bæði hjá stelpum og strákum. Hennar færsla vakti mig til umhugsunar, um þakklætið.“
Þorgrímur bendir á að það skapist hefðir hjá hverju landsliði fyrir sig.
„Ég hef gefið öllum landsliðsmönnum bækur þegar að mig langaði til. Þetta snýst líka mikið um frumkvæði hvers hóps fyrir sig. Ætli það séu ekki einhver tólf landslið starfandi á vegum KSÍ, svo erum við með öll landsliðin í hinum greinunum. Andrúmsloftið í kringum hvert landslið fyrir sig snýst bara um það hvernig leikmenn og starfsmenn eru í kringum það. Það eru þeir sem skapa það.“
Það var greint frá því í byrjun árs að Þorgrímur myndi ekki lengur starfa í kringum karlalandsliðið, eins og hann hafði gert í áraraðir. Heimir Karlsson spurði hann hvort það hefði ekki átt að þakka honum fyrir unnin störf, en það var ekki gert.
„Auðvitað er það kurteisi, en ég gerði engar kröfur til þess.“