Heimsmeistaramótið í Katar er í fullum gangi þessa stundina. Þetta er hins vegar síðasta mótið með þessu sniði. Á því næsta, í Bandaríkjunum, Mexíkó og Kanada eftir fjögur ár, verður liðum fjölgað úr 32 í 48.
Þessi breyting var til umræðu í HM-hlaðvarpi íþróttadeildar Torgs í dag. Kom umræðan upp í kjölfar þess að Kosta Ríka tapaði 7-0 fyrir Spáni á HM í gær.
„Við sjáum svona lið á hverju einasta HM, eins og Kosta Ríka núna. Það verða fleiri drasl-lið á næsta HM og nóg er af þeim fyrir. Ég hef ekki trú á því en ég vona að FIFA bakki með þessa gölnu breytingu,“ segir Helgi Fannar Sigurðsson í þættinum.
Hörður Snævar Jónsson tók í svipaðan streng.
„Ég finn það með Meistaradeild Evrópu, maður er ekki alltaf að drepast úr spennu yfir riðlakeppninni. Það eru margir óspennandi leikir. Það er alltaf verið að reyna að fjölga til að búa til meiri pening. Þetta er eins og hagkerfi virkar, alltaf verið að reyna að stækka. Þetta verður kannski bara til þess að minni áhugi verði á mótunum.“
„Það er ekki hægt að stækka og stækka til að græða meiri pening. Þetta kemur niður á vörunni á endanum,“ segir Helgi að lokum.
