Málefni Kjartans Henry Finnbogasonar hafa verið til umræðu undanfarna daga eftir að KR nýtti sér heimild til þess að segja upp samningi hans.

Fram hefur komið í máli KR-inga að þeir hafi þó vonast eftir því að Kjartan myndi klára tímabilið með liðinu en úr því verður ekki.

„Eins og þú orðar þetta þá er hann samningslaus eftir þetta og það er samningsskylda í efstu deild,“ segir Haukur Hinriksson yfirlögfræðingur KSÍ þegar málið er borið undir hann.

Rúnar Kristinsson þjálfari KR sagði eftir leik gegn Víkingum í gær að Kjartan hefði beðist undan því að klára tímabilið eftir að félagið sagði upp samningi hans.

Kjartan var látinn skrifa undir uppsögn á samningi sínum 13 október og er uppsögnin dagsett þá.. „Hann er með leikheimild og keppnisleyfi, hann er þá hins vegar ekki með samning í gildi og þú átt að vera samningsbundinn í efstu deild vegna tryggingamála,“ segir Haukur.

Rúnar sagði einnig um málið í gær. ,,Þennan örlagaríka fimmtudag þegar hann fær þessa pappíra til að skrifa undir þá gekk ég og við út frá því að þetta væri formsatriði,“ sagði Rúnar á Stöð2 Sport en nú er ljóst að þetta formsatriði gerði það að verkum að Kjartan mátti ekki spila lengur með KR samkvæmt reglum í leyfiskerfi KSÍ.