Þeir sem standa að baki hugmyndinni um nýja Ofurdeild Evrópu hafa síður en svo gefist upp, ef marka má nýjustu fréttir.

Hugmyndin um deildina var sett á laggirnar vorið 2021. Hún féll þó um sjálfa sig eftir hörð mótmæli stuðningsmanna.

Tólf stórlið í Evrópuboltanum ætluðu að taka þátt í Ofurdeildinni og yfirgefa þannig Evrópukeppnir á vegum UEFA. Þetta voru Arsenal, Chelsea, Liverpool, Manchester City, Manchester United og Tottenham á Englandi, Atletico Madrid, Barcelona og Real Madrid á Spáni og AC Milan, Inter og Juventus á Ítalíu.

Þremur dögum eftir að hugmyndin var sett fram drógu öll ensku félögin sig til baka. Í kjölfarið gerðu það þrjú félög í viðbót, öll nema Barcelona, Real Madrid og Juventus, sem hafa ekki gefist upp.

A22 Sports Management er fyrirtækið sem stendur að baki Ofurdeildinni. Hefur það ráðið nýjan forstjóra, Bernd Reichart. Hann segir breytinga þörf í evrópskum fótbolta. Sem fyrr segir hefur hann stuðning Barcelona, Real Madrid og Juventus.

Þeir sem standa að baki Ofurdeildinni eru að undirbúa það að kynna hana til leiks á ný. Sagt er að hún gæti verið sett á laggirnar innan tveggja ára. Samkvæmt fréttum yrði deildin opin, þar sem lið gætu fallið og komist upp um deild, líkt og þekkist í flestum deildum Evrópu.

Vandinn fyrir þá sem styðja hugmyndina er sá að ekkert ensku félaganna stendur við bakið á henni. Enska úrvalsdeildin er sú langvinsælasta í heimi. Þyrfti deildin því á liðum þaðan að halda til að geta verið samkeppnishæf.