Davíð Smári Lamude hefur ákveðið að stíga til hliðar sem þjálfari Kórdrengja í Lengjudeild karla.

Þetta kemur fram í tilkynningu frá honum í kvöld og ljóst er að breytingar verða gerðar fyrir næsta tímabil.

Lengjudeildinni er lokið í bili en Kórdrengir héldu sæti sínu í sumar og það ansi þægilega.

Davíð hefur náð mögnuðum árangri með Kórdrengi undanfarin sex ár en liðið er nú í næst efstu deild eftir að hafa byrjað í þeirri neðstu fyrir ekki svo löngu.

Davíð þakkar fyrir sig á Facebook síðu sinni en tilkynningu hans má lesa hér.

Tilkynning Davíðs:

Ég hef tekið þá erfiðu ákvörðun að ný afstaðið tímabil hafi verið mitt síðasta sem þjálfari Kórdrengja. Þessi tími síðastliðin 6 ár hefur líklega verið minn allra besti, skemmtilegasti og lærdómsríkasti í mínu lífi og það hefur verið algjör heiður að fá að þjálfa þá leikmenn sem spiluðu fyrir Kórdrengi. Ég er þeim gríðarlega þakklátur fyrir traustið og vinnusemina og það sem þeir hafa lagt á sig til að skapa það sem ég og félagið stöndum fyrir. Minningarnar eru endalausar og það er erfitt að brosa ekki þegar maður hugsar til baka. Ég veit að allir þeir sem spiluðuð fyrir Kórdrengi, hvort sem það var í eitt tímabil eða fleiri vita að þetta var einstakt, að komast upp um allar þessar deildir á þessum stutta tíma og að ná að skapa þenna stöðugleika í næst efstu deild er magnað. Þetta er sérstakt lið sem hefur skrifað sína sögu sem ekki verður endurtekin og þetta gerðum við allt þrátt fyrir að keyra uppí móti allan tímann!
Það verður spennandi að fylgjast með liðinu í komandi framtíð úr stúkunni!

Síðast en ekki síst risa ÞAKKIR til þeirra sem trúðu á mig og unnu með mér við þjálfun liðsinns

ITS BEEN ONE HELL OF A RIDE

Takk fyrir mig

Davíð Smári