Barcelona hefur verið í miklum fjárhagsvandræðum eins og þekkt er og er klúbburinn í leit að nýjum styrktaraðilum.

Rakuten hefur verið með samning við Barcelona síðustu ár og er framan á búningum liðsins og Beko framan á æfingafatnaði. Samningurinn við þessi fyrirtæki rennur út eftir sex mánuði og vill Barcelona fá alvöru upphæðir frá nýjum styrktaraðilum til þess að reyna að hjálpa fjárhagsstöðu félagsins.

Félagið er meðal annars að skoða styrktarsamning við tónlistarveituna Spotify og samkvæmt Catalunya Radio yrði Spotify stærsti styrktaraðili klúbbsins. Þá yrði Spotify framan á treyjum liðsins og nafni vallarins yrði breytt.

Þessi samningur er talinn vera metinn á 60-65 milljónir evra en samkvæmt Catalunya Radio gæti nýja nafnið á heimavellinum verið Nou Camp Spotify.