Everton tók á móti Aston Villa í fyrsta leik dagsins í ensku úrvalsdeildinni.
Villa leiddi verðskuldað í leikhléi þökk sé marki Emiliano Buendia í uppbótartíma fyrri hálfleiks. Hann skoraði með skalla eftir hornspyrnu Lucas Digne, sem kom einmitt til Villa frá Everton á dögunum eftir ósætti við Rafa Benitez, þá stjóra Everton.
Í fagnaðarlátunum fékk Digne svo flösku í höfuðið frá stuðningsmönnum Everton.
Dominic Calvert-Lewin, framherji Everton, fékk tvö færi til að jafna í seinni hálfleik en allt kom fyrir ekki. Lokatölur 0-1 sigur Aston Villa.
Aston Villa er í tíunda sæti deildarinnar með 26 stig. Everton er í sextánda sæti með 19 stig, 5 stigum frá fallsvæðinu.