Samningur Mohamed Salah við Liverpool rennur út árið 2023 og vill kappinn ólmur fá nýjan samning við félagið. Enska stórliðið vill líka halda honum en illa gengur í samningaviðræðum þeirra á milli.

Talið er að Salah vilji fá að minnsta kosti 300 þúsund pund vikulega frá Liverpool en Egyptinn sagði nýlega frá því að hann sé ekki að biðja um mikið.

Salah gekk til liðs við Liverpool árið 2017 og hefur frá þeim tíma stimplað sig sem einn allra besta leikmann í heiminum í dag. Hann hefur byrjað þetta tímabil frábærlega og vilja stuðningsmenn halda honum hjá félaginu.

Samkvæmt The Daily Telegraph telur Salah að hann sé að renna út á tíma með að sannfæra stjórnina og veit ekki hvað hann þarf að gera til þess.

Ljóst er að stuðningsmenn félagsins vilja ólmir halda Egyptanum knáa og það vill Jurgen Klopp líka en hann sagði í viðtali á miðvikudag að hann vonist til þess að Salah verði áfram og telur auk þess að stutt sé í að nýr samningur verði tilkynntur.