Það eru líkur á því að Juventus muni leita til Manchester næsta sumar og reyna við markmanninn David de Gea.

Calcio Mercato á Ítalíu greinir frá en De Gea verður samningslaus næsta sumar og má fara annað frítt.

Hingað til hefur ekki gengið að semja um nýjan samning en De Gea hefur lengi verið aðalmarkvörður Man Utd og þykir einn sá besti í að verja bolta.

Spánverjinn hefur þó einnig legið undir gagnrýni og þykir ekki nógu ákafur þegar boltinn berst inn í vítateig.

Juventus hefur áhuga á að semja við De Gea sem má ræða við ný félög í janúar ef ekki tekst að semja upp á nýtt.

Erik ten Hag, stjóri Man Utd, er sagður opinn fyrir því að losna við De Gea og telur hann ekki nógu góðan í að byrja uppspil liðsins.

Ten Hag tók aðeins við Man Utd í sumar en mun treysta á Spánverjann næstu mánuði þar sem varakostirnir eru ekki betri.