Paul Merson, goðsögn Arsenal, bað Harry Maguire, leikmann Manchester United, afsökunar eftir ummæli sem hann lét falla árið 2019.

Merson var alls ekki hrifinn af kaupum Man Utd á Maguire vegna verðmiða leikmannsins en hann kostaði 80 milljónir punda.

Merson sagði að það væri fáránleg ákvörðun af hálfu Man Utd að borga þessa upphæð fyrir Maguire sem lék á þessum tíma með Leicester.

Hann nefndi einnig að Maguire liti vel út í þriggja hafsenta kerfi í enska landsliðinu sem væri blekkjandi þegar kom að hæfileikum leikmannsins,

Merson vissi sjálfur um leið að hann hefði farið yfir strikið og hringdi í varnarmanninn til að biðjast afsökunar.

,,Þetta var bara mín skoðun. Ég hringdi í Brendan Rodgers [stjóra Leicester] og bað um númerið hjá Maguire. Mér leið ekki þægilega,“ sagði Merson.

,,Ég þurfti að hringja í hann og segja að ég væri ekki sammála 80 milljóna punda verðmiðanum en að ég hefði ekki átt að segja það sem ég sagði, ég fór yfir strikið.“