Ólafur Kristófer Helgason, markvörður Fylkis, hefur verið kallaður inn í hóp U-21 árs landsliðs karla fyrir umspilsleikina tvo gegn Tékklandi.
Hinn 19 ára gamli Ólafur var frábær með Fylki í Lengjudeildinni í sumar.
Aftur á móti getur varnarmaðurinn Finnur Tómas Pálmason, sem leikur með KR, ekki tekið þátt vegna meiðsla.
Fyrr í dag var greint frá því að Kristall Máni Ingason þyrfti að draga sig úr hópnum vegna meiðsla.
Kristall, sem er leikmaður Rosenborg, var nokkuð óvænt í hópnum, en hann hefur verið að glíma við meiðsli.
Davíð Snorri Jónasson og aðrir þjálfarar U-21 liðsins ákváðu að taka stöðuna á honum en nú er ljóst að hann verður ekki með.
Sveinn Margeir Hauksson, leikmaður KA, var kallaður inn í hópinn í hans stað.
Fyrri leikurinn gegn Tékkum fer fram á Víkingsvelli klukkan 16 á morgun og sá síðari ytra á þriðjudag.
