Það kom upp hitamál í herbúðum Vals á dögunum þegar leikmaður hringdi í íþróttafréttamanninn Ríkharð Óskar Guðnason og sagði honum frá stemningunni á bakvið tjöldin hjá karlaliðinu. Ekki er ljóst hvaða leikmann er um að ræða en sögusagnir fóru strax af stað um hver gæti hafa átt í hlut. Málið var rætt í Þungavigtinni.
Eftir 1-0 tap Vals gegn tíu leikmönnum Leiknis Reykjavíkur um síðustu helgi tók leikmaður Vals upp tólið og hringdi í Ríkharð, sem sagði svo frá því í Þungavigtinni fyrr í vikunni. Leikmaðurinn á að hafa sagt honum að endurheimt Vals eftir leikinn gegn Leikni hafi verið 18-holu golfhringur hjá öllu liðinu.
Leikmaðurinn á einnig að hafa sagt að Ólafur Jóhannesson, þjálfari Vals, hafi ekki lagt leikmönnum línurnar fyrir leikinn gegn Leikni eða verið með skýrt leikplan.
Í nýjasta þætti Þungavigtarinnar í gær sagði Sverrir Mar Smárason, einn af meðlimum þáttarins, frá því að margir hafi haldið að Arnór Smárason væri leikmaðurinn sem hafi lekið upplýsingunum. Sverrir og Arnór eru bræður og héldu því margir að upplýsingarnar hafi ratað í þáttinn vegna þess.
„Öll spjót beinast strax að okkur bræðrum,“ sagði Sverrir í þættinum.
Ríkharð þvertók fyrir að Arnór væri leikmaðurinn sem um ræðir. „Ég get staðfest það að ég þekki Arnór Smárason ekki neitt. Ég hef aldrei hitt hann eða talað við hann í síma.“
„Ég get sagt það hér og nú að Arnór er ekki leikmaðurinn sem hringdi í mig.“
Kristján Óli Sigurðsson var einnig í þættinum. Hann segir stemninguna í búnigsklefa Vals eins og er afar slæma. „Ég efast um að það sé til klefi á Íslandi þar sem mórallinn er verri en hjá Val núna. “
