Knattspyrnumaðurinn Emil Pálsson, sem lagði nýverið skóna á hilluna eftir tvö hjartastopp á innan við sex mánuðum, settist í Íþróttavikuna með Benna Bó til að spá í spilin fyrir komandi umferð í Bestu deildinni en heil umferð verður spiluð á sunnudag. „Ég hef fylgst vel með undanförið,“ sagði Emil sem var valinn besti leikmaður deildarinnar árið 2015. Hann var þar ásamt Herði Snævari Jónssyni íþróttastjóra Torgs.
Hörður sagði að stórtap Leiknis gegn Víkingum 9-0 gæti hafa sent þá niður um deild. „Þeir fá Val um helgina og þurfa að koma til baka þar. Tap þar er rothögg. Loftið er svolítið farið úr Leiknisblöðrunni finnst mér. Svona tölur eiga ekkert að sjást í efstu deild og eru til skammar. Ég þykist líka vita að Leiknismenn skammist sín fyrir þessar tölur.“
Nökkvalausir KA fá Blika í heimsókn í stórleik umferðarinnar. „Þeir eru að dansa svolítið með Evrópusætið sitt með þessari sölu á Nökkva. Evrópusætið getur gefið allt að 100 milljónir og þeir hafa þurft að vega og meta að selja sinn besta mann því þeir gætu ekki komist í Evrópu verði FH bikarmeistari. Ef Valur hrekkur í gír og svo framvegis.
En ég held að þetta verði þægilegur Blikasigur.“
Benedikt Bóas, sem heldur með Val, sagði frá ferð sinni í Kópavog í vikunni þar sem hann sá sína menn tapa fyrir Blikum. Heillaðist þar af frammistöðu Olivers Sigurjónssyni, sem var sem brynbrjótur á miðjunni. „Hann strögglaði í fyrra en hefur verið frábær í allt sumar,“ sagði Hörður.
Emil benti á að Oliver væri frábær karakter. „Í sumar hefur verið inn og út úr liðinu en að hann skili svona frammistöðu sýnir hvað hann er þroskaður og góður miðjumaður. Þegar Oliver er í stuði er ógeðslega gaman að sjá hann spila fótbolta.“
FH á Skagann heima í fallbaráttuslag. „Þetta er ný áskorun sem FH er að díla við núna. Ég held að þeir þurfa að verja markið sitt og fara leið eitt. Þeir hafa verið að gera það og haldið hreinu í fjóra leiki í röð. FH er samt alltaf að fara halda sér uppi,“ sagði Emil um sína menn.
Hörður benti á að haldi FH sér uppi og endi sem bikarmeistarar mega þeir vel við una. „Við getum staðið eftir tímabilið og FH ætti næst besta tímabilið af öllum liðum. Að vinna Lengjubikarinn sem er ekkert auðvelt og verða bikarmeistarar. Þá er bara Blikar, verði þeir meistarar, sem geta sagt að þeir hefðu átt betra tímabil.
Víkingar verða þá titlalausir og það er möguleiki á því ef KA tekur annað sætið og þeir tapa bikarnum þá er Víkingar ekki með í Evrópu á næsta sumri,“ benti Hörður á.
