Manchester United-goðsögnin Wayne Rooney vill sjá Erik ten Hag, stjóra liðsins, taka Cristiano Ronaldo úr byrjunarliðinu fyrir stórleikinn gegn Liverpool í kvöld.

Rooney spáir í spilin fyrir leik kvöldsins fyrir The Times. Hann telur að með góðum leik gæti United náð í jafntefli gegn Liverpool í kvöld.

United hefur byrjað tímabilið afleitlega. Liðið tapaði fyrsta leik sínum í ensku úrvalsdeildinni gegn Brighton 1-2 og öðrum leiknum gegn Brentford 4-0.

Liverpool hefur ekki heldur byrjað tímabilið vel en er þó ósigrað. Liðið hefur gert jafntefli gegn Fulham og Crystal Palace.

„Ég myndi ekki spila Cristiano Ronaldo og ekki Marcus Rashford. Ef ég væri Ten Hag væri aðaláhyggjuefnið mitt að fá orku á völlinn. United klikkaði á að fá níu inn í sumar sem þýddi að liðið þurfti að tefla fram Ronaldo gegn Brentford,“ skrifar Rooney.

„Hann hefur líka sýnt það að hann vilji fara frá félaginu. Ég veit ekki hverjar ástæðurnar ans eru fyrir því en ég myndi leyfa honum það. Hann er frábær leikmaður og mun alltaf skora mörk, en verkefni Ten Hag er að búa til lið sem getur keppt um titla næstu þrjú til fjögur árin. Það þýðir að það þarf að byggja liðið upp á yngri leikmönnum.“