Réttarhöld í máli Ryan Giggs halda áfram. Þessi fyrrum leikmaður Manchester United er sakaður um margs konar ofbeldi gegn fyrrum kærustu sinni, Kate Greville. Ofbeldið er af andlegum og líkamlegum toga.

Í dag var Elsa Roodt, yfirmaður Greville, kölluð í réttarsal til að bera vitni. Hún sagði frá atviki árið 2017, þegar Greville mætti í vinnuna marin eftir nótt með Giggs.

„Ég spurði hana hvernig hún fékk áverkana og hún sagði mér að eftir rifrildi hafi þau stundað nokkuð harkalegt kynlíf, marblettirnir væru frá því.“

Roodt sagði einnig frá því að Greville hafi mætt með marbletti á höndum sínum í vinnuna í febrúar 2020. „Hún sagði mér að Ryan hafi veist líkamlega að henni kvöldið áður á hótelherbergi.“

Yfirmaðurinn segir að hún hafi þurft að koma í veg fyrir skilaboð sem Giggs sendi stöðugt á Greville, þar sem þau væru að trufla hana í starfi sínu.

„Við þurftum að hringja í fyrirtækið sem sér um netið hjá okkur og loka á skilaboð frá Giggs,“ segir Roodt.

„Kate gat ekki unnið. Þetta var að þvælast fyrir vinnunni hennar svo við þurftum að loka á skilaboð frá honum.“

Roodt segir að Greville hafi virkað mjög hamingjusöm þegar hún byrjaði að vinna með henni. Það hafi hins vegar breyst fljótt og Greville orðið sífellt meira áhyggjufull.