Benjamin Sesko fer ekki til Manchester United en félagið hafði rætt um kaup á framherjanum frá Slóveníu.
Sky í Þýskalandi segir frá því að Red Bull Leipzig sé að kaupa hann frá Red Bull Salzburg. Sömu eigendur eru að þessum félögum.
Búist er við að Leipzig láni Sesko svo til Salzburg út þessa leiktíð en Leipzig er að kaupa Timo Werner frá Chelsea.
Sesko er 19 ára framherji og miklar væntingar eru gerðar til hans í framtíðinni, Manchester United og Chelsea höfðu skoðað að kaupa hann.
Sesko ætlar hins vegar að halda sig innan Red Bull samsteypunnar að sinni.
