John Terry, goðsögn Chelsea, fékk símtal frá Kalidou Koulibaly í sumar en var ekki lengi að skella á.
Frá þessu greinir Koulibaly sjálfur en hann vildi ræða við Terry um treyjunúmerið 26 sem hann klæðist nú hjá félaginu.
Terry gerði garðinn frægan sem leikmaður og fyrirliði Chelsea í þessu treyjunúmeri en hann hefur nú lagt skóna á hilluna.
Koulibaly kom frá Napoli í sumar og fannst rétt að heyra í Terry áður en hann myndi taka að sér þetta númer.
,,Ég bað um símanúmerið hjá John því ég vildi ræða treyjunúmerið. Ég fékk símanúmerið í hendurnar,“ sagði Koulibaly.
,,Ég hringdi í hann en í byrjun hélt hann að ég væri að grínast, hann hélt að þetta væri brandari. Hann þurfti að skella á og hringja í stjórann til að athuga hvort þetta væri í raun og veru ég.“
,,Eftir það þá spurði ég hann hvort ég gæti tekið hans númer, ég vissi að það væri þýðingarmikið fyrir hann. Þegar hann sagði já varð ég mjög ánægður því ég veit hvað hann gerði fyrir félagið og fyrir stuðningsmennina.“