Birkir Már Sævarsson, leikmaður Vals, var gestur í hlaðvarpsþættinum Vængjum þöndum eftir leik liðsins gegn FH í gær.
Valur vann leikinn 2-0, þar sem Guðmundur Andri Tryggvason skoraði bæði mörkin.
Ólafur Jóhannesson er þjálfari Vals. Hann var áður hjá FH en var látinn fara fyrr í sumar. Ólafur var staðráðinn í að vinna leikinn í gær, að sögn Birkis.
„Hann hótaði að drepa okkur ef við myndum ekki vinna, svo við vorum allir með hjartað í buxunum,“ sagði Birkir og hló.
„Það var farið yfir ákveðna hluti á æfingu. Hann þekkir FH-liðið og það var ekkert sem kom okkur á óvart.“
Valur er í fimmta sæti Bestu deildarinnar með 24 stig.
