Selfoss tapaði fyrir HK á svekkjandi hátt í síðustu umferð í Lengjudeildinni.
Liðið komst í 1-0 en tapaði að lokum 1-2. Selfyssingar klúðruðu tveimur vítaspyrnum í leiknum.
Þá fyrri tók Gary Martin og þá síðari Gonzalo Zamorano.
Þetta var rætt í markaþætti Lengjudeildarinnar á Hringbraut á mánudag. Þar sagði Hrafnkell Freyr Ágústsson, sérfræðingur þáttarins, að hann hefði viljað sjá Gary taka seinna vítið einnig.
„Þetta er maður sem er klárlega á besta samningnum þarna. Hann er búinn að vera með bandið, langstærsta nafnið. Þetta finnst mér bara lélegt. Farðu bara aftur á punktinn og taktu hitann. Ef þú klúðrar getur þú allavega tekið það á sjálfan þig,“ sagði Hrafnkell í þættinum.
Eftir góða byrjun á tímabilinu er Selfoss nú í sjötta sæti deildarinnar með 21 stig.
