Sú kjaftasaga hefur gengið manna á milli í dag að Rúnar Kristinsson láti af störfum sem þjálfari KR eftir leik liðsins gegn Val í Bestu deildinni í kvöld. Ekkert er til í henni samkvæmt Páli Kristjánssyni formanni knattspyrnudeildar KR.
KR hefur ekki spilað vel í sumar og gengi liðsins undir væntingum, fjórir mismunandi aðilar hafa haft samband við 433.is í dag með þá sögu um að Rúnar láti af störfum eftir kvöldið.
„Ég var að fá sömu fyrirspurn áðan, það er eins fjarri lagi og hægt er. Þetta er ekkert sem ég hef heyrt af nema bara sögusagnir,“ sagði Páll í samtali við 433.is.
Rúnar gerði KR að Íslandsmeisturum árið 2019 eftir að hafa tekið við liðinu í annað sinn.
KR situr í sjöunda sæti deildarinnar með 17 stig eftir 13 leiki en leikur liðsins gegn Val hefst 19:15 í Vesturbænum í kvöld.
