Það voru heitar umræður í hlaðvarpsþættinum Þungavigtin um leik FH og Breiðabliks sem fram fór í Bestu deildinni í gær. Davíð Ingvarsson fékk að líta beint rautt spjald strax á 9. mínútu í leiknum.

Dómurinn var ansi umdeildur og eru margir á því að þetta hafi aðeins átt að vera gult spjald. Þar á meðal er sparkspekingurinn Kristján Óli Sigurðsson.

„Hahahahah. Crossfit strákurinn hætti við að gefa Gumma seinna gula því hann tekur svo mikið í réttstöðu og hnébeygju,“ skrifaði Kristján Óli á Twitter. Sigurður Hjörtur Þrastarson, dómari leiksins, hefur áður keppt í Crossfit.

Ríkharð Óskar stjórnandi Þungavigtarinnar spurði Kristján hvort Blikar hefðu ekki farið fram úr sér á Twitter yfir leiknum.

„Nei nei, maður má alveg láta gamminn geisa þegar svona kjaftæði er í gangi. Það var fjóri dómarinn sem tók þessa gölnu ákvörðun, línuvörðurinn flaggaði innkast,“ sagði Kristján Óli í Þungavigtinni.

Kristján fór ekki fögrum orðum um Sigurð Hjört dómara. „Sigurður Hjörtur hann dæmdi þennan leik hræðilega eftir rauða spjaldið, var skíthræddur og hann spjaldaði fyrir allt og ekkert. KSÍ þarf að setja standarinn og velja dómara sem einbeita sér að knattspyrnu, hann er einhver slakasti dómari sem ég hef séð í efstu deild. Hann er slakur í handboltanum líka,“ sagði Kristján um Sigurð.

Mikael Nikulásson hinn sérfræðingur þáttarins hefur þetta að segja um stuðningsmenn Blika. „Þetta eru Liverpool stuðningsmenn, það eru nokkrir Blikar þannig líka. Það er alltaf dómaranum að kenna þegar þeir tapa stigum, þetta getur alveg verið rautt spjald. Dómarinn slakur í þessum leik en það bitnaði ekkert meira á Blikum en FH-ingum. Þetta var líka svona eftir jafntefli í Eyjum, þá kenndu þeir dómaranum um og þegar töpuðu gegn Val. Það er oft erfitt að vera á toppnum en þeir eru með gott lið,“ sagði Mikael.