Íslenska kvennalandsliðið leikur sinn annan leik á Evrópumótinu á morgun þegar það mætir því ítalska í riðlakeppninni.

Ísland gerði 1-1 jafntefli við Belga í fyrsta leik riðilsins á meðan Ítalir fengu 5-1 skell gegn Frökkum.

Það er ljóst að leikur morgundagsins er gífurlega mikilvægur fyrir bæði lið. Vinni Ísland ekki er ljóst að liðið þarf að treysta á úrslit gegn Frökkum, einu besta landsliði heims, í lokaumferð riðlakeppninnar.

„Við leggjum áherslu á það eftir þennan fyrsta leik að þetta er enn í okkar höndum. Þetta snýst um okkar frammistöðu. Það er sú staða sem við viljum vera í,“ sagði Þorsteinn Halldórsson, landsliðsþjálfari, á blaðamannafundi nú fyrir stuttu.

„Hópurinn er vel undirbúinn og í góðum gír. Það er mikil tilhlökkun innan hópsins að spila þennan leik á morgun,“ bætti hann við.

Dagný Brynjarsdóttir, miðjumaður íslenska liðsins, tók í svipaðan streng.

„Við erum ótrúlega tilbúnar og hlökkum til að mæta þeim. Við erum búnar að undirbúa okkur vel og ef eitthvað er er spennstigið betra, maður er búinn að taka mesta skrekkinn út í fyrsta leiknum og verðum klárar frá fyrstu mínútu,“ sagði Dagný.