Það væri skref upp á við fyrir Tottenham að semja við markmanninn Jordan Pickford sem hefur verið orðaður við félagið.

Þetta segir Jack Wilshere, fyrrum leikmaður Arsenal, en hann deildi þessari skoðun í samtali við TalkSport.

Pickford hefur verið orðaður við Tottenham undanfarnar vikur en hann spilar með Everton og er einnig landsliðsmarkmaður Englands.

Everton hefur engan áhuga á að losna við Pickford en líkur eru á að Tottenham reyni meira við hann næsta sumar.

Núverandi aðalmarkvörður Tottenham er hinn reynslumikli Hugo Lloris sem er verri í búrinu að sögn Wilshere.

,,Ef þú tekur alla eiginleikana þá er hann betri. Hann er betri að deila boltanum,“ sagði Wilshere.

Lloris hefur lengi verið aðalmarkvörður Spurs en margir hafa þó kallað eftir breytingum þar sem Frakkinn er ekki alltaf áreiðanlegur á línunni.