Liverpool er enn eitt af þeim félögum sem hefur áhuga á því að krækja í Ousmane Dembele, leikmann Barcelona. Sport segir frá.
Það var sagt frá því í gær að Dembele hefði 48 klukkustundir til að taka ákvörðun með framtíð sína hjá Barcelona. Samningur hans við félagið rennur út á miðnætti á fimmtudag en vilja Börsungar hafa málin á hreinu sólarhring fyrir þann tíma.
Frakkinn hafði verið orðaður frá Barcelona nær allt síðasta tímabil en undir lok þess var útlit fyrir að hann myndi skrifa undir nýjan samning.
Nú er hins vegar sagt frá því að framtíð hans sé alls ekki ákveðin og að hann hafi tilboð fjölda félaga á borðinu. Auk Barcelona vilja Liverpool, Chelsea, Bayern Munchen og Paris Saint-Germain öll semja við Dembele.
Hinn 25 ára gamli Dembele lék 21 leik í La Liga á síðustu leiktíð. Hann skoraði aðeins eitt mark en lagði upp þrettán.
Dembele gekk í raðir Börsunga árið 2017 frá Dortmund. Hann kostaði félagið 140 milljónir evra.
