Umboðsmaður Sadio Mane þvertekur fyrir það að leikmaðurinn hafi beðið um of há laun hjá Liverpool sem varð til þess að hann skrifaði undir hjá Bayern Munchen.
Mane er genginn í raðir Bayern eftir sex mjög góð ár á Anfield en hann átti aðeins eitt ár eftir af samningi sínum.
Margir miðlar fjölluðu um það að launakröfur Mane væru of háar og Liverpool hafi þess vegna neyðst til að selja Senegalann í sumar.
,,Þetta eru bull sögusagnir. Leikmaður á borð við Sadio getur ekki verið að þéna þessar upphæðir sem fólk talar um. Þessar tölur voru rangar,“ sagði Bacary Cisse, umboðsmaður Mane.
,,Sadio var nú þegar að þéna mun meira en þegar hann kom fyrst frá Southampton, hann framlengdi árið 2018 og laun hans voru mun hærri en það sem talað var um í fjölmiðlum.“
Mane kostaði Bayern 35 milljónir evra en hann er þrítugur að aldri.
