Miðjumaðurinn Kalvin Phillips er á leið til stórliðs Manchester City en það er Sky Sports sem greinir frá þessum fregnum.

Phillips er einn allra mikilvægasti leikmaður Leeds og hefur spilað glimrandi vel síðan liðið komst í efstu deild og er í dag enskur landsliðsmaður.

Sky segir að Man City sé nú að tryggja sér leikmanninn og er búið að ná samkomulagi við Leeds um kaupverð.

Kaupverðið ku vera á milli 45 til 50 milljónir punda og skrifar hann undir langtímasamning á Etihad.

Phillips er 26 ára gamall og er uppalinn hjá Leeds og verður þriðji leikmaðurinn sem meistararnir fá í sumar.

Erling Haaland er nú þegar kominn til Manchester og er Julian Alvarez á leið til liðsins frá River Plate í júlí.