Romelu Lukaku er á leið aftur til Inter Milan frá Chelsea og mun skrifa undir lánssamning við ítalska félagið.

Curva Nord, hörðustu stuðningsmenn Inter, voru bálreiðir í fyrrasumar er Lukaku yfirgaf félagið og samdi við Chelsea fyrir um 100 milljónir punda.

Lukaku var gríðarlega vinsæll í Mílan en hann vann deildina með liðinu og var svo farinn skömmu seinna. Það gekk illa hjá Lukaku í London og hefur hann beðið um að fá að fara aftur til Ítalíu.

Curva Nord lýsti yfir mikilli reiði eftir brottför Lukaku og hefur nú gefið frá sér tilkynningu þegar styttist í skiptin.

Þar kemur fram að stuðningsmannahópurinn muni ekki mótmæla þessum félagaskiptum en að Lukaku sé alls ekki sá sami í þeirra augum og hann var fyrir félagaskiptin til Chelsea.

,,Curva Nord styður Inter Milan og mun ekki mótmæla leikmanninum,“ sagði í tilkynningu hópsins.

,,Enginn skal hins vegar bjóða hann velkominn með treflum og borðum merktum okkur. Hann þarf að vinna sér það inn. Það gerist með svita og tárum inni á vellinum.“

,,Við komum fram við hans eins og kóng en nú er hann bara leikmaður eins og allir aðrir. Við tökum einnig fram að við munum ekki baula á Lukaku ef hann klæðist treyju Inter á ný.“

,,Við hvetjum alla stuðningsmenn Inter til að falla ekki í gryfjuna, að slefa yfir honum. Við munum eftir því hvernig hann sveik okkur og við vorum gríðarlega vonsvikin. Með tímanum getum við fyrirgefið en staðreyndirnar eru þær sömu.“

Enski boltinn á 433 er í boði