Íslandsmeistarar Vals unnu auðveldan 6-1 sigur á Aftureldingu á Origo-vellinum í Bestu deild kvenna í kvöld.

Ída Marín Hermannsdóttir og Elín Metta Jensen reimuðu á sig skotskóna í fyrri hálfleik en Ída Marín skoraði tvö og Elín Metta eitt er Valur leiddi 3-0 í leikhléi.

Einstefnan hélt áfram í síðari hálfleik. Afturelding missti mann af velli þegar Christina Clara Settles fékk að líta rauða spjaldið á 64. mínútu og gestirnir léku manni færri það sem eftir lifði leiks.

Þórdís Hrönn Sigfúsdóttir bætti við fjórða marki Valskvenna tveimur mínútum síðar eftir rauða spjaldið. Brookelynn Paige Entz skoraði fyrsta mark sitt í Valstreyju á 71. mínútu og Cyera Makenzie Hintzen bætti við sjötta markinu á 83. mínútu.

Katrínu Rut Kvaran tókst að skora fyrir Aftureldingu mínútu síðar en það reyndist lokamark leiksins. Valur er með þriggja stiga forskot á toppi deildarinnar þegar 8 umferðum er lokið. Afturelding er með 3 stig líkt og botnlið KR.