Skipulagning úrslitaleiksins í Meistaradeild Evrópu á Stade de France vellinum í París í gær var „klúður“ að mati Andy Robertson, varnarmanni Liverpool.

Knattspyrnusamband Evrópu, UEFA, frestaði leiknum um meira en hálftíma af öryggisástæðum og sagði að þúsundir stuðningsmanna væru að reyna að komast inn með falsaða miða.

Robertson segist hafa gefið vini sínum miða á leikinn, sem Real Madrid vann 1-0, en honum hafi verið meinaður aðgangur. „Vini mínum var sagt að hann væri falsaður en ég fullvissað þig um að svo var ekki,“ sagði Robertson.

„Þetta var algjört klúður,“ bætti Skotinn við í samtali við BBC Sport. Stóri skjárinn á vellinum sagði að leiknum hefði verið frestað vegna þess að stuðningsmenn mættu seint á völlinn en sumir sögðust hafa mætt klukkutímum áður en leikurinn hófst.

Lögreglan fyrir utan völlinn notaði táragas á lítinn hóp stuðningsmanna sem reyndu að klifra yfir öryggisveggina. Liverpool hefur kallað eftir rannsókn á „óásættanlegum vandamálum“ sem stuðningsmenn þurftu að kljást við en sumir komust ekki á völlinn fyrr en í seinni hálfleik.