Lokaleikur 6. umferðar Bestu deild kvenna í fótbolta fór fram á Kópavogsvelli í kvöld er Blikar tóku á móti Íslandsmeisturum Vals.
Valur gat með sigri í kvöld komist á toppinn í deildinni og Arna Sif Ásgrímsdóttir kom Íslandsmeisturunum í forystu á 55. mínútu þegar hún skallaði boltann í netið eftir hornspyrnu.
Blikar fengu nokkur fín tækifæri til að jafna metin og ekkert betra en á 82. mínútu þegar vítaspyrna var dæmd á gestina. Melina Ayres fór á punktinn en Sandra Sigurðardóttir varði frá henni og tryggði Valskonum þar með þrjú mikilvæg stig.
Valur er á toppi deildarinnar með 15 stig eftir sex umferðir. Blikar eru með níu stig.
