Roman Abramovich eigandi Chelsea er mættur heim til Rússlands og reynir að halda í eigur sínar, hann er sagður hafa ákveðið að yfirgefa Ísrael í upphafi vikunnar til að koma sér heim.

Tvær snekkjur í eigu Roman hafa nú yfirgefið þá staði sem þær voru á og eru komnar til Tyrklands. Engar líkur eru á að Tyrkir muni frysta eigur Roman og hann telur því þær vera komnar í örugga höfn.

Evrópusambandið og Bretland hafa fryst þær eigur Roman sem hægt er, þannig hefur Chelsea í ensku úrvalsdeildinni verið tekið af Roman. Hann má ekki stýra félaginu lengur og félagið er beitt miklum þvingunum.

Er gripið til þessara aðgerða vegna tengsla Roman við Vladimir Putin forseta Rússlands sem ákvað að láta her sinn ráðast inn í Úkraínu.

Snekkjan My Solaris var í Svartfjallalandi en siglir nú í átt að Tyrklandi, sömu sögu er að segja um Eclipse snekkjuna sem var við St Barns í Karabíska hafinu en heldur nú sömu leið. Solaris kostaði Roman 430 milljónir punda en Eclipse kostaði milljarð punda.

Báðar einkaþotur Roman eru nú staddar í Rússlandi samkvæmt fréttum en ljóst er að Abramovich er hræddur um frekari þvinganir vegna innrásar Rússlands í Úkraínu.