Manchester United hefur áhuga á miðjumanninum John McGinn sem leikur fyrir Aston Villa og skoska landsliðið.
Telegraph segir að McGinn sé á óskalista Rauðu djöflana en samkvæmt miðlinum er leikmaðurinn metinn á 40 milljónir punda.
Frammistöður McGinn hafa fangað athygli samlanda hans, Sir Alex Ferguson og Darren Fletcher, en búist er við að Villa bjóði Skotanum nýjan samning.
Paul Pogba, Juan Mata og Jesse Lingard verða allir samningslausir í sumar og ljóst er að félagið þarf á nýjum miðjumönnum að halda. Leiðtogahæfileikar McGinn innan sem utan vallar eru sagðir aðlaðandi í augum stjórnarmanna hjá United.
McGinn færði sig yfir á Villa Park fyrir þremur og hálfu ári síðan og hefur skorað 16 mörk í 129 leikjum fyrir félagið.