Vanda Sigurgeirsdóttir formaður KSÍ er í ítarlegu viðtali við helgarblað Fréttablaðsins þar sem hún fer yfir lífsins leið. Vanda var kjörinn formaður KSÍ í október.

Vanda kom inn á erfiðum tíma hjá KSÍ og var kjörinn til bráðabirgðar. Hún stefnir á endurkjör í febrúar þegar ársþing KSÍ fer fram.

„Þetta var margra vikna ákvörðun. Hún var flókin og við maðurinn minn ræddum þetta fram og til baka. Ég ákvað að gera þetta og hætti við nokkrum sinnum. Aðstæður voru mjög erfiðara og flóknar ákvarðanir framundan. Ég þurfti að spyrja mig hvort ég ætlaði mér inn í þetta,“ segir Vanda við Fréttablaðið.

„Ég var mjög ánægð í starfi og að vinna að málum sem ég brenn fyrir. En mig langaði, ég er auðvitað fótboltamanneskja og hef lengi tilheyrt þessari frábæru hreyfingu sem mér þykir vænt um og langaði að hafa áhrif á hana til góðs. Ég er hugsjónamanneskja og baráttumanneskja og langaði að vera partur af þeim breytingum sem voru óumflýjanlegar.“

Þorsteinn Valsson frændi og æskuvinur Vöndu féll frá í byrjun september og það var vendipunktur.

„Ég var einfaldlega viss um að hann hefði stutt mig í þessari ákvörðun,“ segir Vanda en ræðir einnig um látna foreldra og tengdaforeldra.

„Ég bara sá hann fyrir mér segja mér að láta slag standa. Ég hugsaði líka mikið til foreldra minna og tengdaforeldra, sem öll eru látin. Það er okkar mesta sorg í lífinu að hafa misst þau frá okkur allt of snemma en ég veit í hjarta mínu að þau hefðu stutt mig.“