Mohamed Salah vill fá nýjan samning hjá Liverpool upp á 500 þúsund pund (um 88 milljónir íslenskra króna) á viku. Þetta segir í frétt Mirror.
Salah, sem er 29 ára gamall, hefur verið ein allra skærasta stjarna Liverpool frá því hann kom til félagsins frá Roma árið 2017.
Núgildandi samningur hans rennur út eftir tvö ár. Hann er talinn þéna rúmlega 200 þúsund pund á viku samkvæmt þeim samningi.
Mikilvægir leikmenn Liverpool, líkt og Virgil van Dijk, Alisson og Jordan Henderson, hafa allir skrifað undir nýja og betri samninga við félagið undanfarið.
Það vill Salah einnig gera. Til þess að af því verði þarf Egyptinn þó að öllum líkindum að draga aðeins úr launakröfum sínum.