Samkvæmt heimildum 433.is er Valur að næla í markvörðinn Guy Smit frá Leikni Reykjavík. Hinn 26 ára gamli Smit hefur verið hjá Leikni síðustu tvö tímabil. Hann varði mark liðsins með miklum sóma í Pepsi Max-deildinni í sumar.

Fyrir hjá Val er markvörðurinn Hannes Þór Halldórsson. Hann er samningsbundinn út næstu leiktíð en framtíð hans virðist þó í lausu loti.

Rætt var um málið í Dr. Football hlaðvarpinu í dag. „Mér finnst þetta gríðarlega sérstakt, Hannes var einni maðurinn sem hélt velli í sumar. Hann var besti maður liðsins með yfirburðum, það eru misvísandi sögur frá Hlíðarenda. Sumir segja að þetta sé stormur í vatnsglasi og að Smit verði lánaður og Hannes verði í markinu. Það er eitthvað meira en mikið að þarna miðað við viðtalið við Hannes á Fótbolta.net,“ sagði Jóhann Már Helgason stuðningsmaður Vals og sérfræðingur þáttarins í Dr. Football í dag.

Jóhann segir að vandamál Vals séu mörg. „Það er óstjórnanlega sérstakt miðað við öll vandamál í leik Vals að þetta sé í einhverjum forgangi að fá inn nýjan markvörð,“ sagði Jóhann.

Hjörvar telur að Heimir Guðjónsson sé að taka ákvarðanir þessa dagana. „Þetta hlýtur að hafa eitthvað með þjálfarann að gera, Heimi Guðjónsson. Það sem annað er sérstakt er að Hannes og Smit eru miklir vinir, Hannes kom með Smit til Íslands.“

Þátt dagsins má sjá hér að neðan.