„Líkamstjáning Anthony Martial er ömurleg á að horfa, hann nennir ekki að leggja mikla vinun á sig til að vera sóknarmaður Manchester United,“ segir Dion Dublin fyrrum framherji félagsins eftir ömurlega frammistöðu Martial í gær.
West Ham gerði sér lítið fyrir og vann Manchester United á Old Trafford í enska deildarbikarnum í gær.
Eina mark leiksins skoraði Manuel Lanzini á 9. mínútu.
„Það verður að koma meira frá Anthony Martial, við höfum sagt þetta áður en hann er ekki að reyna að hjálpa sjálfum sér.“
„Ég vil sjá hann svitna og setja boltann í netið. Hann hefur ekki gert nóg hjá United, þú sérð góða kafla og heldur að hann sé að fara á flug en það gerist ekkert.“
Martial þarf eflaust að sætta sig við varamannabekkinn í allan vetur eftir að United fékk Cristiano Ronaldo.
